भोजपुर। नेपाली कांग्रेस भोजपुर जिल्लाको सभापतिमा विनोद बान्तावा निर्वाचित भएका छन् । पार्टीको चौधौँ महाधिवेशनअन्तर्गत भएको निर्वाचनमा उनले ४१५ मत ल्याएका थिए ।
वान्तावाका प्रमुख प्रतिपक्षी नन्दमणी राईले ३९२ र बालकृष्ण थापाले ३६० मत ल्याएका थिए ।
तीनै जनाले खसेको मतको ५१ प्रतिशत ल्याउन नसकेपछि पहिलो र दोस्रो मत ल्याउनेबीच पुनः निर्वाचन हुने अवस्था थियो तर निर्वाचनमा नगएर सहमतिका आधारमा बान्तावालाई नै सभापति बनाइएको कांग्रेसका एक नेताले बताए ।
जम्मा एक हजार २२७ मतमा एक हजार १६७ मत सदर भएको र ६० मत बदर भएको थियो ।
यो सहमतिसँगै भोजपुर कांग्रेसमा लामो समयदेखि कायम राई र थापाको बर्चस्व पनि तोडिएको छ। वरिष्ठ नेता रामचन्द्र पौडेल समूहका बान्तावा सभापति बनेसँगै भोजपुर कांग्रेसको नेतृत्व पनि नयाँ पुस्तामा पुगेको छ।
